🚫 اكتشاف مانع الإعلانات

رواية قصة عشق الجزء الثاني للكاتبة سحر فرج الفصل الخامس

خطوات من بره الاوضه وبتقرب ناحيتهم وخافوا لايكون الحاج صفوان او الحاجه انعام وفجاه الباب اتفتح عليهم ودخلت هدى وملك وفرح وضحى وهما ميتين من كتر الضحك وكانوا سامعين كل الكلام الى الشباب قالوه .. ومن صدمه الشباب الاربعه وفى نفس الوقت فرحه عدى وفهد قربوا منهم و هايجروا على هدى وملك اول لما شافوهم لكن سليم وقف فى وشهم وقال .. استنى انت وهو رايحين فين .. مفيش اى كلمه مع البنات وانا وقصى هنا اهو وهانمنعكم انكم تكلموهم .
جدى منبه علينا كلنا بكده انت فاهم منك ليه ولا لا .

عدى بصدمه رد وقال .. حرام عليك يا سليم والله اللى بتعملوه فينا ده احنا كنا عملنا ايه لده كله يعنى .. ولا انتم علشان مقضينها يا عرسان انت وهو مش صعبانين عليكم ..مش حرام اشوف عروستى اودامى ومقدرش اكلمها ولا المسها ايه الافتراء ده .. ما تقول حاجه يا سى فهد انت واقف متنح كده ليه لملك وساكت يعنى .

فهد بنظرات كلها شوق لملك قرب منها وقال .. ملك انا بحبك اوى والله .. وانا اسف على اللى عملته يوم الدخله .. ارجوكى تسامحينى يا حبيبتى واوعدك انى مش هاسمع كلام عدى ده تانى خالص .
ملك بنظرات كلها تحدى وقوه ردت وقالت... لو سمحت انا مش حبيبت حد.. ومن هنا ورايح ملكش دعوة بيا خالص انا غلطانه وبندم انى اتجوزت واحد زيك اصلا.

هدى هى كمان بصت لعدى بكل غيظ وراحت وقفت جنب أخوها وقالت .. وانا كمان يا سى عدى .. من هنا ورايح انسى انى هدى بتاعه زمان الطيبه الهبله اللى هاتضحك عليها بكلمتين حلوين ... وانسى كمان انى مراتك يا بيه .. ومش عاوزة اشوف وشك تانى .. انت فاهم .. وانا من دلوقتى هاعتبر نفسى لسه متجوزتش وهاطلب من جدى واخويا سليم اهو انى اطلق منك يا عدى .

عدى بصدمه وزهول من كلام هدى راح جنب فهد وقال .. يا وقعه سودا الحق يا فهد البنات بتقول ايه .. وانا اللى كنت متخيل انهم هايفرحوا لما يشفونا .
فهد لسه هايتكلم ويرد على عدى سمعوا صوت الحاج صفوان وهو بيتكلم مع صلاح وحسين بره والظاهر كانوا رايحين صلاه الفجر جماعه وشكلهم كده جايين عليهم فى الاوضه .

عدى بصدمه وخوف قال .. يا لهووووى خبونى خبونى الحاج صفوان جاى وهايشوفنا نعمل ايه نعمل ايه يا قصى .
فهد هانعمل ايه يعنى تعالى بسرعه نخرج فى البلكونه اخلص يا عدى بدل ما هايموتنا اخلص بسرعه .
وفعلا جرى عدى هو وفهد بسرعه وراحوا فى البلكونه ومن قرب صوت الحاج صفوان ودخوله للاوضه خافوا اكتر وفهد قال .. بسرعه نط ... بسرعه نط واخلص يا بهيم.

عدى .. يااااااا اااختاااى .. انط ايه الله يخرب بيتك وطلعوا ووقفوا هما الاتنين على الكراسى فى ثوانى وشد فهد ايد عدى ونطوا هما الاتنين من البلكونه .
هدى وملك اتصدموا اول لما شافوهم عملوا كده وكان هاين عليهم يجروا ويطمنوا عليهم بس دخول الحاج صفوان الاوضه فى اللحظه دى وقفهم مكانهم بس وشوشهم كان ظاهر عليها الخوف والقلق على عدى وفهد.

الحاج صفوان باستغراب لما شافهم كلهم متجمعين كده مع بعض قال .. خير يا عرسان في ايه متجمعين كده ليه .
قصى بص لسليم ورد وقال .. ابدا يا جدى مفيش حاجه كل وما فيها...
سليم رد وقال ... ابدا يا جدى اصل ملك كانت تعبانه شويه وهدى جت صحتنى انا وقصى علشان تخلى ضحى تكشف عليها وتشوفها مالها .
صلاح بخوف قرب من ملك وقال .. ملك حبيبتى فيكى ايه يا قلب ابوكى ايه اللى تعبك قوليلى تحبى اخدك واروح المستشفى دلوقتى .

ملك بصت لهدى ولقصى وردت وقالت .. انا كويسه الحمد لله يا ابوى .. كان شويه مغص وراحوا لحالهم متقلقش وضحى اديتنى مسكن والحمد لله بقيت احسن .
الحاج صفوان .. يعنى بقيتى كويسه دلوقتى يا بتى الحمد لله ؟
ملك ردت على جدها وقالت .. اه يا جدى الحمد لله .

الحاج صفوان بص للكل وقال .. ماشى يا عرسان كل واحد فيكم ياخد مرته ويروح على اوضته النهار قرب يشقشق وهدى هاتفضل مع ملك لحد الصبح .
وانا هاخد بعضى وانزل اصحى البهايم اللى تحت دى كفياهم نوم علشان يروحوا على المصنع دلوقتى .
حسين رد وقال .. بس يا ابوى مش لسه بدرى على المصنع دى الساعه لسه خمسه الفجر .

الحاج صفوان .. ولا بدرى ولا حاجه وبعدين انا بعاقبهم على عملتهم علشان يعرفوا غلطتهم كويس ويعرفوا ان الله حق.
حسين .. اللى تشوفوا يا ابوى .. وانا لما ارجع من الصلى هاروح اريح شويه فى اوضتى .
صلاح .. خدنى معاك يا اخوى لما نصلى وارجع على طول اصل انا كمان حاسس بشويه صداع هايفرتكوا راسى .
وفعلا سليم وقصى كل واحد خد مراته ودخله اوضتهم وفارس وسلمى كانوا فى دنيا تانيه خالص ومش حاسين باى حاجه من اللى بتحصل برة .
نصف ساعه وكانوا رجعوا من الصلى وصلاح وحسين كل واحد راح على اوضته لكن الحاج صفوان فضل واقف مع البواب بتاع السرايه .

فهد وعدى كانوا لسه قاعدين مكانهم من النطه الى نطوها من البلكونه وبيتوجعوا لانهم نطوا على ارتفاع تلاته او اربعه متر بس اللى حماهم النجيله اللى فى الجنينه شويه .
ومع ذلك عدى حس ان فى حاجه حصلت فى رجله شرخ أو جذع لانه قام وقف ومقدرش يقف عليها خالص.
فهد لاحظ كده على عدى وساله وقال .. مالك يا ابنى انت اتكسرت ولا ايه مالك مش قادر تقف على رجلك كده ليه .
عدى بألم رد وقال .. الظاهر كده رجلى حصل فيها حاجه مش قادر اقف عليها.

فهد طيب هات ايدك واتسند عليا وتعال نرجع على المخروبه الزريبه قبل ما حد يشوفنا انا خلاص تعبت اوى انا كمان ومش قادر اصلب طولى .
ولسه يا دوبك هايتحركوا من مكانهم الا سمعوا صوت رفاعى على بعد وهو بيكلم الحاج صفوان .
الحاج صفوان .. صباح الخير يا رفاعى ايه الاخبار .. طمنى العيال وصلت امتى من المصنع .
رفاعى .. صباح النور يا حاج .. والله فضلت سهران جمب الباب لحد ما وصلوا من المصنع .. الساعه كانت بعد 12 وقولتلهم بالضبط زى ما أمرتنى وبعدها دخلت نمت ولسه يا دوبك صاحى .

الحاج صفوان .. ماشى يا رفاعى تعال معايا يالا ونروح لهم الزريبه واشوفهم بنفسى .
رفاعى .. حاضر يا حاج .
وفعلا رفاعى مشى ورا الحاج صفوان وراحوا ناحيه الزريبه .
وكل الكلام ده كان سامعه عدى وفهد ومكنوش عارفين يتصرفوا ازاى ويروحوا الزريبه ازاى وجدهم هايعرف انهم مش نايمين فيها زى ما قال .
فهد انا جتلى فكرة تعالى بسرعه نلف من الناحيه التانيه وهانوصل للزريبه قبل ما جدك يوصل هو الاول .

عدى .. فكره برضه المشكله انى مش قادر ادوس على رجلى الا بالعافيه والظاهر فعلا حصل فيها حاجه بسبب النطه .. بس مش مشكله دلوقتى يالا بينا بسرعه .
وفعلا فهد مسك ايد عدى وحاولوا انهم يوصلوا للزريبه من الناحيه التانيه قبل ما الحاج صفوان يوصل قبلهم .. ورغم التعب والوجع اللى كان حاسس بيه عدى فى رجله الا انهم وصلوا الزريبه بسرعه قبل الحاج صفوان وناموا على الارض واتغطوا وعملوا نفسهم نايمين .

ولحظات وكان داخل الحاج صفوان عليهم الزريبه وشاور لرفاعى انه يجيب الجردل اللى مليان مايه بارده ده ويدلقه على عدى وفهد وهما نايمين علشان يصحيهم .
وفعلا رفاعى ما صدق ونفذ على طول وفى ثانيه كان ماسك الجردل ودالقه فوق الاتنين .. اللى قاموا منطورين من الارض من خضتهم .
عدى .. ايه ده ايه ده حرام عليكم .

الحاج صفوان .. فز يا بقف منك ليه كفياكم نوم .. يالا عشر دقايق تكونوا غيرتوا لبسكم وحصلتونى على بره علشان نروح مع بعض على المصنع اشوف اللى هببتوه امبارح فى الشغل .
فهد بغضب رد وقال .. يا جدى احنا ملحقناش ننام والله وهلكانين وتعبانين سيبنا ننام ونريح لنا شويه ونروح زى ما انت عاوز الساعه لسه مجتش سته .
عدى بص لجده وقال .. يا جدى والله انا تعبان جدا ورجلى شكلها مجزوعه ومش قادر ادوس عليها سيبنا ننام شويه وبعدها نعمل اللى انت عاوزه .

الحاج صفوان من منظر الشباب والتعب والارهاق اللى كان باين عليهم كان هايحن عليهم ويسبهم يناموا بس رجع فى كلامه وقال .. هى كلمه واحده .. عشر دقايق بالضبط والقيكم بره عند الباب .. سامعين يا بهايم ولا لا .. وسابهم وخرج لبره هو ورفاعى .
عدى بص لفهد وقال .. يا نهارك الاسود يا عدى .. مكنش يومك يا عدى .. كان يوم منيل عليك يا عددددددددى اااااااه يا انى يا أما .
فهد بعصبيه رد وقال .. الله يخرب بيتك يا عدى انت السبب فى كل القرف اللى انا فيه ده ربنا ينتقم منك يا شيخ ... وبعدها على طول
بدؤا ينفذوا اللى الحاج صفوان امرهم بيه وغيروا لبسهم وخرجوا على بره وهما هلكانين وتعبانين على الاخر .
وراحوا للحاج صفوان اللى خدهم وركبوا العربيه وراحوا على المصنع .

عدى حوالى كام ساعه وكل اللى فى السرايه كانوا صحيوا ونزلوا على تحت علشان الفطار .
الحاجه انعام قاعده فى مكانها المفضل وماسكه سبحتها بتسبح بيها بعد ما صلت ركعتين زى عادتها .
وفاتن واحلام وسماح مع بعض فى المطبخ كلهم من بدرى بيجهزوا الفطار للعرسان وكمان رجالتهم .
احلام بحزن بصتلهم وقالت ... انا مش عارفه الحاج صفوان هيسامح عدى وفهد امتى .. العيال وحشونى اوى ومكانهم على السفره فاضى وبالذات عدى اللى بيدى للمكان روح حلوة .

سماح بحزن ردت وقالت .. عندك حق يا احلام العيال فعلا وحشونا والواحد زعلان عليهم وفرحتنا بالعرسان ناقصه بسببهم .. ولولا الحاج صفوان والحاجه انعام منبهين علينا اننا ما نروحش ولا نطمن عليهم كنا روحنا واطمنا عليهم .
فاتن بعصبيه ردت وقالت .. يا سلام يا اختى انتى وهى وهدى وملك مش صعبانين عليكم فاللى البهوات عيالكم عملوه فيهم يوم دخلتهم .. ما تنطقى منك ليها .. تخيلوا ملك او هدى بناتكم مكنتوش هاتزعلوا عليهم وعلى حسرتهم وكسرتهم يوم فرحهم .

احلام بحزن ردت وقالت .. والله يا فاتن زعلانه علشانهم .. دول مهما كان زى سلمى بنتى برضه وكان نفسى يفرحوا يوم دخلتهم زى فرح وسلمى بالضبط ..بس نقول ايه الواد عدى وعارفين ان دماغه مهويه شويه وغلط فى اللى عمله وخد فهد فى الرجلين معاه .. كنا سامحناهم علشان خاطر ملك وهدى وعدينا ليهم وخلاص الغلطه دى من غير العقاب بتاع الحاج صفوان ده .

فاتن .. لا يا احلام قولى الحق .. لازم يتربوا الاول على اللى عملوه والحاج صفوان عنده حق فى كل اللى بيعمله معاهم هما الاتنين ويحمدوا ربنا ان صلاح شايل جواه منهم وساكت .. ده كفايه نظره الحزن اللى فى عيونه لما يشوف البنات اودامه .

سماح .. خلاص يا بنتى انتى وهى انا سامعه صوت الرجاله جم بره اهم وشكلهم نزلوا من فوق علشان الفطار .. هاتى الاطباق اللى خلصت يا فاتن وجهزى البيض والبطاطس المحمرة يا احلام وحطيهم فى الاطباق وتعالى ورايا .. واه متنسيش القشطه والعسل اللى بيحبهم سليم .. وانتى يا هنيه ولعى على براد الشاى ووطى عليه عقبال لما يفطروا .

وفعلا الكل كان شغال زى النحله والكل بيساعد بعضه زى ما عودتهم الحاجه انعام طول السنين اللى فاتت بالضبط حتى فى عدم وجودها .
وفى اوضه قصى وفرح اللى كانوا صحيوا وغيروا لبسهم بعد ما خدوا الشور بتاعهم وكانوا بيجهزوا نفسهم علشان ينزلوا على تحت للفطار .. فرح كانت لسه بتسرح شعرها ورفعته لفوق بالتوكه ديل حصان.

وقصى بابتسامه كان بيراقبها وهو قاعد على حرف السرير فقام وقف وقرب منها ولف ايده على وسطها من ضهرها وباسها من رقبتها برقه وضمها لصدره اوى وبص ليها فى المرايه وقال .. بحبك
فرح اتنهدت بشويش وابتسمت وحست بقشعريره فى جسمها من لمسه قصى ليها ولفت نفسها ليه وعيونها جت فى عيونه وقالت .. وانا كمان بحبك اوى اووى اوووى يا قصى
قصى برومانسيه وشوق ولهفه رد وقال .. اجمل واطعم واحلى قصى سمعتها فى حياتى .

فرح برقه .. بجد يا حبيبى .
قصى رد وقال .. بجد يا عيون حبيبك ..وقلب حبيبك .. وووووووو باسها من شفايفها بكل عشق وشوق بس للاسف...
باب الاوضه كان بيخبط فابعد قصى عن فرح وقال .. مين الرخم اللى جه دلوقتى .
فرح بحب .. مش عارفه روح شوف مين .
قصى فعلا راح للباب وفتح وشاف سلمى اخته هى وفارس اودامه فقال .. صباح الخير.

فارس رد وقال .. صباح النور يا هندسه .. الجماعه بيستعجلونا تحت علشان الفطار .. هات فرح وتعال يالا علشان سليم سبق على تحت هو وضحى وانا جيت اقولك .
قصى رد وقال .. ماشى يا عم اسبق انت وسلمى وانا هاحصلك على تحت على طول .
ولسه هايدخل ويقفل الباب وراه الا سمع سلمى بتقول .. اه يا قصى صحيح هى ايه الدوشه والاصوات والهيصه اللى كانت قرب الفجر دى .. اصل سمعتها وانا نايمه ولما صحيت سألت فارس وفارس معرفش هو كمان .. هو كان فى حاجه ولا ايه .
قصى .. لا ابدا هابقى احكيلكم بعدين مفيش حاجه مهمه متقلقيش .

ولسه هايمشوا الا وفرح كانت فتحت الباب على الاخر وصبحت عليهم وقالت .. اذيكم يا حلوين .
فارس بحب قرب من اخته وخدها تحت كتفه وباسها وقال .. الحمد لله يا حبيبه اخوكى .. انتى اخبارك ايه يا عروسه .. اوعى الواد قصى يزعلك .
قصى .. اطلع منها انت يا فارس واوعى انت اللى تزعل سلمى حبيبتى .. يالا بينا ننزل علشان اتاخرنا جدا عليهم وجوعناهم .. وفعلا نزل الكل على تحت واتجمعوا على السفره بعد ما سلموا على الحاجه انعام وعلى الكل وسألوا على جدهم وبلغوهم انه فى المصنع من بدرى مع عدى وفهد .. وقعدوا يفطروا .

وفى المصنع وبالتحديد فى اوضه المكتب .. كان قاعد الحاج صفوان ومعاه الاسطى حربى وبيعرض عليه كل الشغل والملفات الى عملوها الشباب امبارح .
الحاج صفوان اتفاجأه ان الشباب نفذوا كل حاجه على اكمل وجه ومكنش متخيل ان العيال دى بهيافتهم والبلاوى والمصايب اللى بيعملوها دى يقدروا يعملوا الشغل مضبوط كده بالمنظر ده وفى الوقت القصير ده .. وبينه وبين نفسه قال .. فعلا رجاله عيله السيوفى ..

عدى كان قاعد على الكنبه هو وفهد وكان مش قادر من التعب والالم اللى كان حاسس بيه فى رجله فافهد خد باله من وشه اللى بيتألم وعيونه جت فجاه على رجل عدى وشاف هى اد ايه مزرقه وورما فاتصدم ونزل على الارض ومسك رجل عدى بشويش ورفع البنطلون لفوق وقال .. يا خبر .. ايه ده .. رجلك عامله كده ليه يا ابنى انت .

عدى بألم شديد من لمسه فهد قال ... ااااااااه حاسب يا بتاع انت .
الحاج صفوان انتبه لصوت وكلام فهد وعدى وقام وقف وقال .. فى ايه يا فهد ماله عدى حصله ايه .
فهد .. الحق يا جدى عدى رجله شكلها مكسورة بص منظرها عامل ازاى ومزرقه وورمه جامد .
الحاج صفوان بقلق وخوف وحنيته قام وقف وقرب من عدى هو و الاسطى حربى وشاف منظر رجله وقال .. ايه اللى عمل فى رجلك كده .. انت وقعت عليها ولا ايه ياض انت انطق .

عدى بالم ووجع .. اااه يا جدى هى اتجزعت منى وانا ماشى امبارح ومكنتش اعرف انها هاتزيد وتزرق وتورم كده بالمنظر ده .
الحاح صفوان .. طب قوم قوم وتعال نروح على المستشفى خليهم يشوفوا فيها ايه ويعلجوها .
عدى بوجع .. مش مشكله يا جدى مش مستهله مستشفى هى شويه كده وهاتروح وتخف لوحدها .
الحاج صفوان بغضب .. بقولك قوم ويالا بينا على المستشفى .. خد يا فهد مفاتيح العربيه اهى وهاتها اودام باب المصنع على طول عقبال ما الاسطى حربى يسنده وينزله على تحت ونروح على المستشفى .

فهد بقلق على منظر رجل عدى قال .. ماشى يا جدى اللى تؤمر بيه .
وفعلا حربى خد عدى ونزلوا على تحت مع الحاج صفوان وفهد كان جاب العربيه اودام الباب وركبوا كلهم وراحوا على المستشفى .
وربع ساعه فى الطريق وكانوا وصلوا اودام باب المستشفى ودخلوا عدى على الاستقبال وكان بيتوجع من رجله جدا جدا ومش قادر يدوس عليها.. وبدا الدكتور يكشف عليه وطلب اشاعه فورا على الرجل لانه شاكك انها تكون مكسورة .

وفعلا عملوا الاشاعه لعدى وطلعت رجله مكسورة من جوة فاجبسوها ليه وبعد ما خلص كل حاجه طلع وبلغ الحاج صفوان على كل حاجه .
الحاج صفوان باستغراب سأل الدكتور وقال .. ازاى مكسورة يا دكتور ده بيقول انه اتشنكل وهو ماشى ازاى تتكسر بس .
الدكتور .. يا حاج الاشاعه ظهر فيها ان الرجل مكسورة ومعنى كده انه وقع من مكان عالى او ارتفاع عالى مش معقول يكون اتشنكل وهو ماشى خالص .
فهد طبعا كان عارف كل الحكايه ومقدرش ينطق فقال .. المهم يا جدى اننا عرفنا انها مكسورة وجبناه على المستشفى واتجبست اهى وشويه وهاتخف الحمد لله .
تسمحلنا يا دكتور ندخل نطمن عليه ؟

الدكتور رد وقال .. اه اوى اوى وشويه وهاتقدروا تخدوه على البيت بس اهم حاجه عاوز راحه وميمشيش ولا يقف عليها اقل من تلت اسابيع علشان الكسر يلحم .. والف سلامه عليه .
الحاج صفوان .. تشكر يا دكتور وروح يا حربى انت حاسب المستشفى عقبال لما نطمن على الواد عدى .
حربى .. عيونى يا حاج وربنا يشفيه ويعافيه يارب عن اذنك وخد بعضه وراح على الحسابات علشان يحاسب على الاشاعه والتجبيس وحساب المستشفى .
والحاج صفوان خد بعضه ودخل هو وفهد يطمنوا على عدى .

وفى السرايه الكل كان متجمع مع بعضه وبيتكلموا فى حاجات كتير وبيشربوا الشاى
وبيهزروا .. وقصى كان قاعد جنب فارس على جنب وبيحكيله على اللى عدى وفهد عملوه بالليل وهما نايمين .
والبنات كانت مع بعضهم وبيحكوا لسلمى على اللى حصل بالليل معاهم .
وبعد حوالى ساعه .
فجاه دخل عليهم الحاج صفوان وقال .. سلامو عليكم ...

الكل رد وقال .. وعليكم السلام ورحمة الله وبركاته.. اذيك يا حاج .
الحاج صفوان .. بخير الحمد لله .. وقال .. ادخل يا فهد بشويش وخلى بالك منه .
الكل استغرب من كلام الحاج صفوان وعيونهم ركزت على باب السرايه واتفاجؤا بدخول فهد وهو ساند عدى واتصدموا اول لما شافوا رجل عدى المتجبسه ومنظره ده .

الكل جريوا عليه واولهم هدى ووقفت اودامه وبعيون كلها دموع قالت .. مالك يا عدى حصلك ايه طمنى عليك .
عدى بعيون كلها عتاب افتكر كلامها الجارح ليه وفضل السكوت .
الحاج صفوان بحنيه وعطف طبطب على كتفها وقال .. اهدى يا هدى يا بتى متقلقيش هو زى القرد اودامك اهو .. تعالوا اقعدوا كلكم وهو كمان يقعد علشان الدكتور منبه على الوقفه دى وهاحكيلكم على كل حاجة.

وفعلا قصى جرى ووقف جنب اخوه وسنده مع فهد وقرب من ودنه وقال .. هو ده حصلك بسبب النطه بتاعه البلكونه امبارح يا سوبر مان
عدى بغيظ رد وقال .. اخرس يا زفت انت بدل ما جدك يسمعك مش كفايه الهم والقرف اللى انا فيه ده .
قصى بشماته رد وقال .. ماشى ماشى ما تقلقش يا عريس كده كملت معاك يا باشا ابقى ورينى هاتدخل ازاى على عروستك وتحكى الحواديت كمان .

عدى بغيظ .. الله يخرب بيتك منك ليه ليه وبص لسليم وبص لفارس وقال .. انتم اللى ضربتونى عين جبتونى الارض منكم لله منكم لله يا غجر
وراحوا وقعدوا كلهم وبلهفه وقلق الحاجه انعام قالت .. خير يا حاج الواد ده حصله ايه وايه اللى شندله بالمنظر ده .
وقبل ما الحاج صفوان ينطق الا ورفاعى داخل بصوت عالى وبيقول..
يا حاج يا حاااااج الحق يا حاااااج صفوان الحق بسرعه .

رواية قصة عشق الجزء الثاني للكاتبة سحر فرج الفصل السادس

الحاج صفوان باستغراب قام وقف وقال .. فى ايه يا رفاعى مالك جاى على ملى وشك كدة ليه .. ايه اللى حصل خلاك متسربع كده ليه .
رفاعى بخوف رد وقال .. الحق يا حاج صفوان الحكومه واقفه كلها بره وبتسال عليك وعوزينك ضرورى وانا مردتش ادخلهم من البوابه غير لما ابلغك الاول .
الكل اتصدم واستغراب وقال .. فى ايه يا حاج الحكومه بره ليه وعاوزة مننا ايه ؟
الحاج صفوان باستغراب رد وقال .. العلم علمكم هاطلع اشوفهم عاوزين ايه .
قصى وسليم وفارس .. استنى يا جدى جايين معاك نشوف ايه الحكايه .

وفعلا خرج الحاج صفوان ومعاه احفاده لان للاسف عياله الرجاله كانوا راحوا على المصنع التانى بعد ما فطروا والحاجه انعام قلبها بدا يدق جامد وحست ان فيه حاجه كبيرة حصلت وقالت .. ربنا يستر مش عارفه قلبى بيقولى ان فيه مصيبه حصلت .. استرها يارب .
الحريم والبنات رغم قلقهم وخوفهم بدؤا يهدوها ويطمنوها وان اكيد فى حاجه تخص اى حد من اهل البلد وعاوزين جدهم فى كده مش اكتر .
عدى بهزار زى عاويده رغم اللى هو فيه قال .. اهدى يا كبيرة متخافيش هايكون فى ايه يعنى .. تلاقى مرات جدى التانيه اللى هى ضرتك رفعت عليه قضيه خلع ولا حاجه وعاوزين جدى علشان كده .

فهد ضربه فى كتفه وقال .. بطل رخامتك وهزارك الرخم ده هو ده وقته مش شايف جدتك قلقانه ازاى يا بهيم انت .
عدى مش عاجبه كلام فهد ورد وقال سيبنالك العقل يا سى فهد انت .. وبص على رجله وقال .. اوووف هو الواحد هايفضل فى المخروب اللى اسمه جبس ده لامتى انا مش طايق نفسى من دلوقتى وهاين عليا اجيب منشار وانشره من رجلى .
فهد بقرف بصله وقال .. تسمح تتنيل وتنقطنا بسكوتك .. انا هاطلع اشوف ايه اللى بيحصل بره وفى ايه بالضبط .

وفعلا فهد خد بعضه وخرج لحد بوابه السرايه وشاف ضباط وعساكر واقفين مع الحاج صفوان فقرب منهم واول لما وصل سمع الضابط بيقول .. احنا عندنا امر بالقبض على
عدى السيوفى وفهد السيوفى المتهمين فى قتل سوزى الغازيه (الراقصه) اللى اتقتلت امبارح بالليل فى شقتها .

الكل اتصدم من كلام الضابط للحاج صفوان وبدؤا يبصوا لبعض بصدمه واستغراب لان ده اخر حاجه ممكن كانوا يتخيلوها انها تحصل .
قصى بصدمه رد وقال .. حضرتك بتقول ايه .. استحاله طبعا ان ده يحصل .. انت متاكد من الكلام اللى بتقوله ده يا حضره الضابط .
الضابط رد وقال .. اه طبعا وعندى امر حالا بالقبض عليهم هما الاتنين .. انا علشان خاطرك يا حاج صفوان عملت بالاصول وقولت اتكلم معاكم بالهداوه لانك كبير العيله والبلد كلها .. وياريت تسمح لنا بالقبض عليهم دلوقتى .

الحاج صفوان من الصدمه حس ان الدنيا بدات تلف بيه اول لما سمع الكلام ده من الضابط وحاول يتمالك نفسه على اد ما يقدر وبص للضابط وقال .. بس عدى تعبان ولسه جايبه من المستشفى واستحاله يجى معاكم بمنظره ده .. انا اللى هاجى معاكم واشوف ايه الحكايه وايه صحه الكلام ده .
الضابط باسف .. اعذرنى يا حاج صفوان .. دى اوامر ولازم انفذها .. فامن غير شوشرة كده هات عدى وفهد معايا دلوقتى فى البوكس وابقى حصلنا على مديريه الامن .. وياريت تشوفوا ليهم محامى كبير لان القضيه كبيرة اوى ولبساهم لبساهم .

الكل واقف مصدوم ومش عارفين يتصرفوا ازاى ولا يعملوا ايه بالضبط لحد ما فهد بقلق وخوف قال .. الكلام ده غلط ومش مضبوط .. احنا معملناش حاجه اقسم بالله اكيد فيه حاجه غلط .. جدى اتصرف .. اوعى تخليهم يخدونا يا جدى ابوس ايدك يا جدى .. والله ما عملنا حاجه ولا انا ولا عدى .
الحاج صفوان بحزن قال .. لا حول ولا قوة الا بالله .. لا حول ولا قوة إلا بالله استرها يارب .
الضابط .. اسمحلى يا حاج صفوان .. وقرب من فهد ومسكه من ايده وقال انت فهد السيوفى .
فهد بخوف وقلق رد وقال .. ايوا انا فهد .

الضابط رد وقال .. خده يا عسكرى حطه فى البوكس .. وانت يا عسكرى منك ليه تعالوا ورايا نجيب عدى السيوفى ..بعد اذنك يا حاج صفوان .. ودخل على جوه والكل وراه لحد ما وصلوا لباب السرايه ودخلوا .
واول لما دخلوا الكل قام وقف واتصدم من دخول الضابط والعساكر على الحريم والحاجه انعام لجوه السرايه والكل وقفوا باستغراب .
الضابط عيونه ركزت على عدى وهو قاعد ومجبس رجله وقرب منه وقال .. انت عدى السيوفى صح .
عدى باستغراب رد عليه وقال .. ايوا انا عدى خير فى ايه .

الضابط .. عندنا امر بالقبض عليك انت وفهد السيوفى فى قضيه قتل الرقاصه سوزى امبارح بالليل .
عدى اتصدم من التهمه اللى الضابط وجهها ليه وقال .. رقاصه ايه وقتل ايه ..الكلام ده مش مضبوط انا معملتش حاجه ولا انا ولا فهد .. مين قال كده ومين اصلا سوزى دى ؟
الضابط بكل جديه رد وقال .. الكلام ده ابقى قوله فى النيابه .. خده يا عسكرى على البوكس .

وفعلا العساكر مسكت عدى وشدوه على بره والحاج صفوان خرج وراه هو والشباب والحريم بدات تصرخ جامد وهدى بكل حزن ودموع جريت على عدى وبصتله وقالت .. عدى متسبنيش يا عدى .. عدى علشان خاطرى متسبنيش يا عددددددى .
وملك بتصرخ جامد على فهد هو كمان .. الحاجه انعام من كتر الخوف والحزن وكل اللى بيحصل حواليها الدنيا لفت بيها ووقعت من طولها على الارض واغمى عليها والحريم جريت عليها بسرعه وحاولوا يفوقوها .

بس للاسف مقدروش .. فحاولوا يسندوها لحد ما نيموها على الكنبه .
فاتن بحزن .. هاتى ازازة برفان يا سلمى بسرعه .
سماح .. فوقى يا حاجه .. فوقى يا حبيبتى .. استرها يارب .. استرها يارب .
احلام بكل حزن ودموع مغرقه وشها .. انا لازم اتصل بالرجاله فى المصنع يشوفوا المصيبه اللى احنا فيها .
وفعلا جريت ومسكت الموبيل بتاعها اللى كان على تربيزة السفره واتصلت بعصام على رقمه .. واول لما رد قالت .. الحقنا يا عصام بسرعه .. هات اخواتك وتعالوا بسرعه احنا فى مصيبه .

عصام بصدمه .. اهدى يا احلام .. فهمينى فى ايه بالضبط .. ابويا وامى كويسين . حد حصله حاجه .. العيال كاها كويسه .
احلام بعياط .. الحق يا عصام ... الحكومه جت وقبضت على عدى وفهد كمان وبيقولوا انهم قتلوا رقاصه .
الحقنا يا عصاااااااام .. الحقوناااا بسرعه .
والحاجه انعام وقعت من طولها لما سمعت الخبر المشؤم ده واغمى عليها ومش عاوزة تفوق .
عصام من الصدمه رد وقال ... احنا جايين حالا حالااااا وقفل الموبيل مع احلام .

احلام جريت على الحاجه انعام علشان تشوفها فاقت ولا لا . والحمد لله كانوا قدروا يفوقوها بالبرفان وبدات تفتح عيونها اللى كانت كلها دموع وكانت بتقول بصوت واطى .. عداااااى .. فااااااهد ... عدى.. فهد .. ااااه يا حبايبى .
فاتن بحزن ودموع ردت وقالت .. اهدى يا حاجه اهدى يا حاجه ابوس ايدك .. هما هايكونوا بخير متقلقيش واكيد فى غلط او لبس فى الموضوع مش اكتر .. واكيد الحكومه غلطت وشويه هانلاقيهم داخين علينا كلهم مع الحاج صفوان .

سماح بحزن ودموع على اللى حصل قربت من الحاجه انعام وقعدت جنبها ومسكت ايديها و قالت .. اهدى يا حبيبتى وزى ما قالت فاتن اكيد فى حاجه غلط واستحاله عدى او فهد يعملوا حاجه زى كده دول عيالنا واحنا اللى مربينهم وعارفين انهم عمرهم ما يعملوا حاجه زى كده .. وفين وامتى ولسه كانت صباحيتهم امبارح وطول النهار والليل امبارح كانوا فى المصنع .. اكيد فى حاجه غلط وحياتك يا حاجه .

البنات كانوا قاعدين جنب هدى وملك وبيحاولوا يهدوهم لانهم كانوا ميتين من كتر العياط بسبب اللى حصل لعدى وفهد والبلوة اللى هما وقعوا فيها .
فرح .. اهدى يا بنتى منك ليها انا متاكده انهم استحاله يعملوا كده ابدا وبعدين طول اليوم امبارح كانوا فى المصنع ورجعوا متاخر وبعدها هنا فى السرايه وفى اوضتكم انتوا نسيتم ولا ايه اللى حصل امبارح .

هدى .. يا فرح انا عارفه كل الكلام ده كويس ومتاكده انهم استحاله يعملوا حاجه زى كده .. بس انا خايفه اوى عليهم وقلبى مقبوض وعدى صعبان عليا اوى وكفايه موضوع رجله واللى حصل فيها بسببنا . وكمان الكلام الوحش اللى انا قولته ليه . كان انقطع لسانى قبل ما اقوله حاجه زى كده .
هو ليه حظه وحش دايما كده .. عدى مفيش اطيب ولا احن منه ليه يحصل كده معاه .

سلمى بعياط ردت وقالت .. يا حبيبتى عدى اخويا وفهد ابن عمى واخويا برضه وانا متاكده انهم ما يقدروش يأذوا ولو حتى نمله .. مش يقتلوا واحده وكمان رقاصه .
ان شاء الله شويه وهنلاقيهم داخلين علينا ويقولوا ان اكيد حاجه غلط حصلت او تشابه اسماء او اى شىء غير انهم يقتلوا ويبقوا مجرمين .
الا وشويه و دخل عليهم صلاح وحسين وعصام وهما ملهوفين عليهم وعلى وشهم القلق والتوتر .
واول لما دخلوا عيونهم كانت بدور على الحاجه انعام واول لما شافوها جريوا عليها وقعدوا على رجليهم على الارض وقربوا منها .
صلاح بكل حنيه وقلق قال .. خير يا امى .. الف سلامه عليكى يا حبيبه قلبى .. مالك يا حبيبتى.

حسين بحزن .. الف سلامه عليكى يا غاليه .. ان شاء الله العيال هاترجع بالسلامه متقلقيش عليهم علشان خاطر صحتك واحنا قولنا نيجى نطمن عليكى انتى الاول اول لما احلام بلغت عصام وهانروح ونطمن عليهم هما كمان .
الحاجه انعام كانت ساكته خالص وعيونها مليانه دموع وبتبص لواحد واحد من عيالها بكل وجع وحزن على اللى حصل لعدى وفهد احفادها .

عصام بكل حزن والم وعيون كلها دموع مقدرش يمسك نفسه من العياط اول لما شاف امه بالمنظر ده والحزن والتعب اللى هى فيه فقعد تحت رجليها ومسك ايديها وقال .. قومى يا امى علشان خاطرى انا مقدرش اشوفك كده .. قومى يا حاجه انعام واقعدى على كرسيكى ونورى السرايه زى ما بتنوريها دايما .. انتى روحنا كلنا والنفس اللى الكل بيتنفسه يا حاجه .. قومى يا امى ابوس ايدك .

الحاجه انعام من منظر عيالها وكل اللى حواليها بدات تعدل نفسها على الكنبه وقعدت ووبكل حزن قالت .. اطمنوا انا بخير .. المهم خدوا بعضكم واطمنوا على عدى وفهد .. ومترجعوش على السرايه غير وهما فى أيديكم ...سامع يا صلاح انت وحسين وعصام .. انا عاوزة احفادى حبايبى انا امووووت لو حد منهم حصله اى حاجه وعيطت جامد وقالت هاتولى عدى وفهد .
صلاح بكل طيبه وحنيه باس ايديها وقال .. متقوليش كده يا حبيبتى .. ربنا يخليكى لينا ويديكى طوله العمر انتى والحاج صفوان .. احنا هانروح لهم دلوقتى ونجبهم ونيجى على طول مسافه السكه .. ماشى يا حاجه .

فوقى انتى كده وروقى وقومى صلى ركعتين وادعيلهم ان ربنا يفك قربهم .
الحاجه انعام .. هاقوم يا صلاح .. قوموا انتم يالا وطمنونوا عليهم اول لما توصلوا على طول .
وفعلا قام الاخوات التلاته ولسه هايخرجوا من باب السرايه الا وصلاح عيونه جت على ملك وهدى وشاف كميه الحزن والوجع اللى هما فيه فالف نفسه ليهم وبكل حنيه وطيبه قرب منهم وخدهم هما الاتنين فى حضنه وهما ما صدقوا اترموا فى حضنه الدافىء فاهون عليهم صلاح وطمنهم ان الشباب هاترجع بالسلامه .
وبعدها سابهم وخرج مع اخواته على طول وركبوا العربيه وطلعوا بيها على طول على مديرية الأمن .

وبعد نصف ساعه وأودام مديريه الامن كان وصل صلاح بالعربيه وركن على جنب ونزل هو واخواته ودخلوا من الباب .. واول لما دخلوا صلاح مسك موبيله ورن على قصى .
صلاح وهو بيرن على قصى ومنتظر الرد لمح الحاج صفوان والشباب واقفين على بعد .. فاكنسل الاتصال ومد برجله بسرعه وقال .. الجماعه اهم تعالوا نروح لهم بسرعه .

وفعلا جريوا بسرعه وراحوا ليهم واول لما راحوا الحاج صفوان شافهم وقال .. العيال هايضيعوا مننا يا صلاح .. العيال هايضيعوا من تحت ايدينا .. اللهم لا أسألك رد القضاء ولكنى اسألك اللطف فيه .
حسين قرب من الحاج صفوان وقال .. اهدى يا ابوى علشان خاطرنا ان شاء الله هايخرجوا بالسلامه .. وعيونه ركزت مع قصى وسليم اللى كانوا وقفين جنب جدهم وقالهم هو فى ايه بالضبط والحكومه اتهمتهم بأيه وخدتهم من السرايه لييييه ؟

سليم بحزن رد عليه وقال .. المحامى معاهم جوه ومن شويه طلع وقالنا ان فى بنت رقاصه اتقتلت امبارح بالليل فى شقتها .. ولما الجيران لقوا باب الشقه مفتوح استغربوا ودخلوا عليها لقوها غرقانه فى دمها وميته .
ولما بلغوا الحكومه.
الحكومه جت بسرعه و فتشت الشقه وعاينت المكان كله ولقوا محفظه عدى وفهد جنب الجثه .
عصام بصدمه رد وقال .. استحاله العيال تعمل كده .. استحاله عدى او فهد يعملوا كده .. اكيد فى حاجه غلط .

صلاح .. كلامك مضبوط يا عصام .. العيال مش معقول تعمل كده .. وبعدين رقاصه ايه اللى هايروحلها فى شقتها ويموتوها بالمنظر ده لبه وعلشان ايه .
ولسه هايكمل كلامه الا وباب الاوضه بتاع وكيل النيابه اتفتحت وثانيه وخرج المحامى بتاع الحاج صفوان اللى كان جه على طول اول لما الحاج صفوان اتصل عليه وبعتبر المسؤول عن المصانع والاراضى بتاعته.. وبعدها خرج العساكر وهما ماسكين عدى وفهد وملبسين فى ايديهم الكلبشات.
فاتصدم الكل وبذات عصام ابوا عدى اول لما شاف عدى ومنظر رجله المتجبسه .
والتعب والارهاق اللى باين على وشهم هما الاتنين .

عدى بصلهم بحزن ووجع وقال .. والله العظيم ما عملنا حاجه .. والله يا جدى ما عملنا حاجه .. قولهم يا جدى اننا طول اليوم امبارح كنا فى المصنع .. قولهم يا جدى علشان خاطرى . وبص لابوه وقال .. والله يا ابوى ما عملنا اى حاجه .
قولهم يا فهد اننا معملناش اى حااااااجه .
فهد بص للكل بحزن وقال .. اقسم بالله ما عملنا حاجه .. ولا نعرف مين سوزى دى اصلا ولا عمرنا شوفناها .
العساكر شدوهم هما الاتنين بالعافيه وخدوهم ومشيوا فى طرقه طويله .

وعدى بزعيق وصوت عالى وبحزن بيقول .. والله ماااااا عملنا حاجه .. والله مااااا عملنا حاجه .
الحاج صفوان بصوت عالى قال .. متقلقوش يا رجاله عيله السيوفى .. احنا معاكم ووراكم وهانفضل ورا الموضوع لحد ما نظهر الحقيقه .. خلى بالكم من نفسكم انتم الاتنين وخلى بالك من عدى يا فهد .
ومن كتر الحزن والالم الى هو فيه على احفاده حس ان الدنيا بتلف بايه وبسرعه سند نفسه على الحيطه وكان هايقع الا وقصى وسليم جريوا عليه وسندوه لاقرب كرسى وقعدوه .

صلاح بص لفارس وقال .. اجرى يا فارس يا ولدى بسرعه .. هات ازازة مايه لجدك اكيد ضغطه على عليه .
وفعلا جرى فارس وراح جاب ازازة مايه وسقى الحاج صفوان اللى ضربات قلبه كانت عاليه اوى وسريعه وجبينه عرقان .
ولما استريح شويه وقدر يقف .. قام بتعب وبص للمحامى وقال .. خير يا حضرة المحامى .. طمنى على العيال .
وقولى هما خدوهم وهايروحوا بيهم على فين .

المحامى رد وقال .. للاسف يا حاج .. التهمه لبساهم لبساهم هما الاتنين .. الحكومه لقت محفظه عدى ومحفظه فهد جنب القتيله وده اكبر دليل على انهم كانوا معاها فى نفس الشقه وقضوا السهرة وياها وازايز الخمرة اكبر دليل على كده واكيد بعدها حصل اختلاف ما بينهم وقاموا بقتلها .
الحاج صفوان .. لا حول ولا قوه الا بالله .. لا حول ولا قوة الا بالله .

صلاح بحنيه .. اهدى يا ابوى علشان خاطر صحتك وربنا ان شاء الله هايظهر الحق والمحامى هايقولنا هانعمل ايه دلوقتى .
المحامى رد وقال .. وقفتكم دى ملهاش اى لازمه خدوا بعضكم وارجعوا على السرايه لان وكيل النيابه أمر بحبسهم اربع ايام على ذمه التحقيق .
حاولوا ترجعوا وتفكروا كده .. وتشوفوا الشباب كانت فين بالضبط من الساعه تلاته الفجر لحد خمسه الفجر بالتحديد لان هو ده التوقيت اللى سوزى الرقاصه اتقتلت فيه .. ولو عندكم حاجه تثبت ان عدى وفهد كانوا فى السرايه فى التوقيت ده هايكون لينا كلام تانى مع النيابه .

ومن كتر اللخمه اللى هما كانوا فيها وكل اللى بيحصل حواليهم .. نسى قصى وسليم ان ده نفس التوقيت اللى عدى وفهد كانوا فيه فى اوضه ملك ساعه ما كان قصى وسليم نايمين فى السرير مطرح البنات .
فاخدوا بعضهم كلهم وخرجوا بره مديريه الامن وركبوا عربياتهم ورجعوا على السرايه .
وفى السرايه كان الكل متجمع حولين الحاجه انعام بكل قلق وحزن ومنتظرين اى تليفون من الحاج صفوان او الرجاله والشباب يطمنوهم .
او انهم يوصلوا السرايه ويدخلوا كلهم عليهم ومعاهم عدى وفهد وترجع البسمه الحلوة ليهم كلهم .

رواية قصة عشق الجزء الثاني للكاتبة سحر فرج الفصل السابع

بس للاسف الكل اتفاجأه بدخول الحاج صفوان ومعاه عياله الرجاله واحفاده كلهم الا عدى وفهد .. وده اللى صدم الكل واولهم كانت الحاجه انعام اللى بمنتهى الحزن والخوف والقلق قامت ووقفت وقربت من الحاج صفوان ووقفت اودامه وبصت فى عيونه الحزينه اللى عرفت منهم ان عدى وفهد مش راجعين تانى ... فقالت .. فين العيال يا حاج صفوان ؟ فين احفادى عدى وفهد ؟

الحاج صفوان بكل حزن رد وقال .. اهدى يا حاجه وتعال نقعد كلنا وهاقولكم على كل حاجه .. اهدى الله يخليكى علشان خاطر صحتك .
الحاجه انعام بعيون مليانه دموع بصت للكل وردت وقالت .. كده برضه يا حاج .. كده برضه يا صلاح انت واخواتك .. جالكم قلب تيجوا من غير ما تجيبوا عدى وفهد معاكم .. هى دى الامانه اللى امنتكم عليها انكم تجيبوها .. هما دول العرسان اللى يا دوبك اتجوزا من يومين حتى لسه ما دخلوش دنيا ولا فرحوا .. هما ... وفجاه مسكت قلبها والدنيا لفت بيها وبسرعه الكل جريوا عليها واولهم صلاح وسليم لكن للاسف وقعت على الارض وغابت عن الوعى .

الكل خاف عليها جدا عيالها واحفادها حتى الحريم اللى اول لما شفوها بالمنظر ده بدؤا يصرخوا جامد .. والرجاله شخطت فيهم وزعقت ليهم .
صلاح بغضب بصلهم وقال .. ما اسمعش صوت واحده فيكم .. سامعه يا مرة منك ليها .
الحاج صفوان برعب عليها ..اتصلوا على الدكتور بسرعه .. بسرعه قبل ما الحاجه تضيع منينا .
الشباب بكل حب شالوها بسرعه ودخلوها الاوضه اللى جنب اوضه المكتب .. ونوموها على السرير وغطوها بكل حنيه عقبال لما الدكتور يجى .. وحاولوا كذا مرة انهم يفوقوها بالبرفان لكن للاسف مقدروش على كده ..

وملامحها ولونها بدات تتغير جامد وده اللى خوفهم اوى .. وخلال عشر دقايق بالضبط الدكتور كان وصل وكشف عليها .. واول لما خلص كشف عليها ملامح وشه اتغيرت وبص للحاج صفوان وبحزن قال .. انا اسف يا حاج صفوان .. الحاجه لازم تتنقل على المستشفى فورا .. حاجه انعام جالها جلطه على القلب ولازم تتحجز فى العنايه المركزة فورا .. وفى عربيه اسعاف مجهزة .

الكل اتصدم من كلام الدكتور .. وبسرعه كانوا اتصلوا على المستشفى علشان يبعتلهم عربيه الاسعاف وخلال العشر دقايق كانت وصلت اودام باب السرايه .. واهل البلد كانوا اتلموا عليها وكانوا عاوزين يعرفوا فى ايه بيحصل جوا السرايه ..
وفى ثوانى المسعفين كانوا دخلوا لجوا وخدوا الحاجه انعام مع انهيار الكل وزعلهم وحزنهم على اللى بيحصل ليهم من أول اللى حصل لعدى وفهد واتهامهم بقتل الرقاصه .. واللى كمان بيحصل للحاجه انعام ومكنوش مبطلين عياط .

شويه وعربيه الاسعاف كانت وصلت اودام باب المستشفى وكان وراها كذا عربيه للحاج صفوان وعيالها واحفادها كلهم .
وبسرعه دخلوها لجوا على اوضه العنايه المركزه وقفلوا الباب لان ممنوع دخول اى حد فى الحاله اللى هما فيها دى غير لما يسمح لهم بالزياره .
وبسرعه نوموا الحاجه انعام على السرير وعلقوا لها الاجهزة وقام كذا دكتور بالكشف عليها واكدوا فعلا انها ذبحه صدريه مع جلطه على القلب وان الحاله خطيرة وحرجه جدا .

الكل كان واقف بره قلقان ومتوتر و مرعوب عليها لحد ما باب الرعايه اتفتح وخرج الدكتور فاجريوا عليه وبلهفه سال صلاح الدكتور وقال .. خير يا دكتور طمنا على الحاجه اخبارها ايه ؟
الدكتور رد وقال .. انا هاتكلم بكل صراحه معاكم علشان تبقوا عارفين بالضبط فى ايه عند الحاجه انعام والحاله ايه بالضبط .. للاسف الشديد الحاله حرجه جدا وخطيرة ادعولها انها تعدى منها على خير .. الحاجه انعام تعرضت لضغط نفسى كبير وهو ده اللى عمل عندها ذبحه صدريه وكمان جلطه على القلب .. واحنا المفروض فى حاله زى كده ندخلها عمليات فورا علشان نعمل لها قسطرة ودعامه على القلب علشان ندوب الجلطه .. بس للاسف الحاله حرجه جدا ولازم نستنى لما نطمن على كل حاجه الاول وبعدها نقرر اننا نجرى لها العمليه ولا لا .

وللاسف هاتطر امنع الزياره عنها ال 24 ساعه الجايين دول .. بعد اذنكم .
الحاج صفوان.. لا حول ولا قوة الا بالله العلى العظيم .
يااااارب استرها معانا يارب وعديها على خير .
يا دوبك الدكتور مشى وسابهم وجه جبل الجبلاوى عم سليم وشافهم على بعد وجرى عليهم وقال .. خير يا جماعه .. الحاجه انعام مالها .. انا اول لما عرفت .. جيت على طول طمنونى هى عامله ايه .. طمنى يا سليم يا ولدى .

سليم بحزن رد على عمه وبلغه بكل اللى الدكتور قال عليه عن حاله جدته .. فازعل عمه جبل جدا عليها .. وقال .. ربنا هايشفيها باذن الله وهتقوم بالسلامه وترجع تنور السرايه زى الاول واحسن كمان باذن الله متخافش عليها يا حاج صفوان ربنا كريم وهاتقوم منها على خير .
الحاج صفوان بحزن على شريكه حياته رد وقال .. يااااارب يا جبل يا ولدى يااارب .. انا هانزل اصلى فى الجامع اللى جنب المستشفى .. تعالوا كلنا ننزل وندعيلها انها تقوم لنا بالسلامه وربنا يعديها على خير .
وانت يا حسين اتصل باللى فى السرايه زمانهم قلقانين وقولهم على حاله الحاجه يا ولدى .. وخليهم يصلوا كلهم و يدعولها .

لمه العيله والحب والحنيه والضحكه الحلوة اللى كانت بتطلع من القلب بين الكل .. من الجدود .. للاحفاد .. للاسف حصل فيها شرخ كبير واتفرقوا شهر كامل ما بين المستشفى والمديريه والسرايه بسبب عيون الناس اللى حسدتهم على لمتهم دى وفرقتهم عن بعض .
جزء منهم كان بيروح للحاجه انعام المستشفى ويطمنوا عليها وكانوا بيتمنوا انها تتحسن وتفوق وترجع زى الاول بس للاسف فضلت الحاله حرجه شهر كامل من غير اى تحسن يظهر عليها .

وعدى وفهد ما بين تحقيقات النيابة واخذ بصماتهم وسؤال كل اللى كانوا بيترددوا على الرقاصه دى فى شقتها وشهاده كل الجيران والشهود ان فى فعلا اتنين كانوا بيترددوا عليها دايما فى الشقه .. والاتنين دول كانوا على علاقه مشبوهه بيها .. وشكلهم معروف للجيران .. وبعد عرض صور عدى وفهد على الجيران .. انكروا معرفتهم بيهم وانهم اول مرة يشوفوهم ويتعرفوا عليهم .

حتى الناس اللى كانت شغاله مع الرقاصه فى المحل بتاعها مقدروش يتعرفوا عليهم وبلغوا النيابه انهم اول مرة يشوفوهم حتى مكنوش بيشوفوهم فى المحل خالص مع المجنى عليها .
حتى بصماتهم ملقوش اى بصمه ليهم فى شقه القتيله .
والطب الشرعى لاحظ ان فيه بصمتين مختلفين لشخصين وجارى البحث عليهم .
وبعد تلت اسابيع عدى فك الحبس من رجله وهو فى الحبس .

اما المحامى كان على اتصال دايم بعدى وفهد وبيعرف اخبارهم اول باول عن طريق ناس يعرفهم جوا الحبس .. والحاج صفوان كان طلب منه انه يجيب لهم تصريح بالزيارة علشان يشفوهم ويطمنوا عليهم .
وفعلا جهز ليهم تصريح الزياره وقبل ما يروحوا يشوفوهم كانوا عدوا على الحاجه انعام فى المستشفى وكان معاهم الحريم والبنات كلها .

وبعد ما راحوا واطمنوا على حالتها من الدكتور فى النصف ساعه اللى مسموح ليهم بيها بزيارتها .. طلبوا من فارس وسليم انهم يخدوا الحريم والبنات ويوصلوهم للسرايه .. وهما خدوا بعضهم وراحوا على مديربه الامن .. وقابلوا المحامى وخدوا منه التصريح و العسكرى خدوا منهم وقدموا لوكيل النيابه اللى سمح لهم بزيارتهم .
وعلى طول العسكرى دخلهم اوضه وقعدهم عقبال ما يجيب عدى وفهد من الحبس بتاعهم .

وبعد اقل من خمس دقايق الباب كان اتفتح ودخل العسكرى بعدى وفهد بعد ما فك ليهم الكلبشات وخرج وقفل الباب عليهم .
الكل اتصدم من منظر عدى وفهد اللى يوجع القلب وعيونهم الدبلانه وجسمهم الهزيل والتعب والارهاق اللى ظاهر عليهم .
ودقنهم اللى طلعت فى وشهم وشعرهم اللى طول ولبسهم اللى كان مش نضيف ومسكوا نفسهم بالعافيه علشان ما يظهروش زعلهم عليهم .
الحاج صفوان بابتسامه كلها حنيه وحب مد ايده الاتنين ليهم وقال .. تعالوا فى حضن جدكم يا رجاله عيله السيوفى .. وحشتونى اوى اوى يا حبايب قلب جدكم .
عدى وفهد ما صدقوا شافوا حضن جدهم مفتوح ليهم وجريوا عليه واترموا فيه وحسوا بالحب والحنان اللى افتقدوه خلال المده الكويله دى كلها دى اللى دخلت على شهر ونصف وفضلوا يبوسوا ايده وراسه .

وسلموا على صلاح وحسين وعصام وقصى .. بكل حب وشوق .
عدى بص فى عيون جده وقال .. والله يا جدى انا برىء انا وفهد .. ومعملناش اى حاجه من اللى بيقولوا عليها دى ومتهمنا فيها .. اقسملك يا جدى .. وحياتك عندى انت وجدتى انعام ما عملنا اى حاجه .
وبص لقصى وكمان سليم وقال ...

قصى وسليم عارفين احنا كنا فين فى الميعاد ده بالذات ومع مين وشافونا بعيونهم كمان. واستحاله نعمل اصلا حاجه زى كده ومنعرفش مين هى اصلا سوزى دى ولا عمرنا سمعنا عنها .. قوله يا قصى .. قوله اننا كنا كلنا مع بعض فى اوضه ملك .. قوله اننا اتشعلقنا على المواسير اللى فى الجنينه وفى سور البلكونه وطلعنا علشان نشوف البنات ونطمن عليهم .. وكلكم شوفتونا وكنتم معانا .. قولهم انى نطيت من البلكونه انا وفهد ووقعت على رجلى وده سبب انها اتكسرت .. قولهم يا قصى ساكت ليه .. قووووول ما تتكلم ساكت ليه .

قصى بأسف رد وقال .. للاسف يا عدى انا وسليم اعترفنا لجدى وقولناله كل الكلام ده .. وجدى بلغ المحامى بكده .. والمحامى قال مينفعش حد مننا يشهد على مكان وجودكم فى الميعاد اللى حصلت فيه الجريمه دى .. ولازم اللى يشهد يكون بعيد عن الاهل .. ولازم يكون فى شهود من برة او دليل انهم فعلا وهما داخلين السرايه بالليل حد من بره شافهم وهما داخلين قبل الميعاد ده .
وللاسف الوقت كان متاخر جدا لما رجعتم من المصنع واهل البلد كلهم كانوا ناموا .. ومفيش اى حد شافكم غير اللى موجودين فى السرايه ومفيش حد من بره السرايه شافكم وانتم راجعين من المصنع .

فهد سرح شويه فى كلام قصى وفجاه قاااال ..
لا فيه .. كان فى اتنين شافونا واحنا راجعين متأخر من المصنع فى اول داخله البلد .. على الطريق .. وكان الاتنين دول ظهروا اودامنا فجأه وعدى سايق العربيه و علشان الدنيا كانت ضلمه والضوء ضعيف طلعوا فجاه اودامنا مش عارف ازاى وكأنهم قاصدين كده وعدى فرمل بسرعه وخبطهم بالعربيه خبطه خفيفه واتخانقنا معاهم ساعتها وضربناهم لما طولوا لسانهم علينا .

عدى .. ايوا فعلا هو ده اللى حصل .. والعيال دى كانت شكلها غريب اوى وكمان شكلهم عارفين احنا مين بالضبط وده سبب خنقنا معاهم لما غلطوا فينا وفى عيلتنا .. وانا حسيت انى شوفتهم قبل كده بس فين مش فاكر خالص وفعلا اللى استغربتله ان العيال دى كانت موجوده ليه فى وقت متاخر زى كده فى المكان ده .
الكل اتفاجاه بكلام فهد وعدى واستغربوا للحكايه دى اوى وقرروا انهم يقولوا للمحامى جايز يقدر يوصل ليهم او يبلغ وكيل النيابه بكده وهو اللى يحاول يوصل ليهم ولشخصيتهم .

وللاسف الزياره كانت انتهت من غير ما يشبعوا منهم ويطمنوا عليهم والعسكرى دخل علشان يرجعهم للحبس تانى .
عدى بسرعه قال .. طمنونى على جدتى انعام وعلى هدى وعلى كل اللى فى السرايه .. قوللهم اننا معملناش أى حاجه .. وبص لصلاح وقال عمى صلاح قول لهدى انى برىء وحياتها عندى انا برىء وما عملتش اى حاجه .. قولوا لجدتى أنعام وامى انهم يدعولنا واننا نخرج على خير من هنا ونرجع نتلم تانى زى الاول .. قولهم يا ابوى قولهم وحياتى عندك .

فهد بحزن بص لابوه وقال .. وانت كمان يا ابوى .. طمن جدتى وامى عنى .. وقول لملك انى هارجع لها .. وهاعمل لها اكبر فرح من أول وجديد .. قولها انى بحبها اوى اوى والله .. قولها حقك عليا متزعليش بسبب اللى عملته يوم دخلتنا .. قولها فهد هايموت ويرجع يتلم تانى فى وسطكم وفى حضن عيلته كلها .
العسكرى شدهم هما الاتنين وخرج من الاوضه .. والكل خرج وراهم .. والحاج صفوان بحنيه بصلهم وقال .. خلى بالكم من نفسكم ومن بعض .. وخلى الدكتور يكشف على رجلك ويطمنك عليها يا عدى يا ولدى .. ربنا معاكم وقادر يرجعكم لينا تانى ونتلم زى زمااان .
لا حول ولا قوة إلا بالله .. اقف معاهم يارب .. اقف معاهم يا كرييييييم .

واول حاجه عملوها اول لما خرجوا من مديريه الامن انها اتصلوا بالمحامى وبلغوه بكل الكلام اللى فهد وعدى قالوه والمحامى وعدهم انه هايبلغ وكيل النيابه بكلامهم ده ويحاولوا يوصلوا للشخصين دول باسرع وقت ممكن علشان هما دول الشهود على وجود عدى وفهد فى التوقيت المتاخر ده قرب السرايه .
وفى السرايه كان الحزن هو المسيطر على كل الموجودين .. كل واحد قاعد فى مكان غير التانى .. كل واحد بيفكر فى اللى حصل بطريقته .. فى منهم اللى كان بيصلى ويدعى برجوع عدى وفهد .. وبالشفاء للحاجه انعام
ورجوع لمتهم الحلوة زى زمان .

الرجاله كانت رجعت للسرايه .. ودخلوا على جوه كلهم .. واول حاجه هدى عملتها هى وملك اول لما سمعوا صوتهم تحت انهم نزلوا من اوضتهم بسرعه علشان يطمنوا على عدى وفهد .
الحريم كمان كانت خرجت من المطبخ وخرجوا وسلموا على الكل وبدؤا يسالوا عن الشباب .
احلام قربت من الحاج صفوان وقالت .. خير يا عمى .. طمنى على العيال اخبارهم ايه ومفيش اى جديد فى تهمتهم دى ..ولا المحامى قادر يعمل لهم حاجه .. قلبى بيتقطع على عدى اوى وعلى اللى بيحصل فيه هو وفهد ابن عمه .

ملك بحزن قعدت جنب جدها وقالت .. طمنى يا جدى هما عاملين ايه دلوقتى وهايخرجوا امتى من الحبس ويرجعوا فى وسطنا .
هدى بحزن اه والنبى يا جدى .. طمنى عليهم والنبى .. وعدى عامل ايه واخبار رجله اللى كانت مكسورة ايه دلوقتى .
الحاج صفوان بصلهم وقال .. اطمنوا كلكم وادعولهم يخرجوا قريب على خير .. عن اذنكم هاطلع اوضتى واغير لبسى واتوضا واصلى واريح شويه لانى هلكاااان وتعبان اوى اوى .

فاتن بكل حنيه بصتله وقالت .. الف سلامه عليك يا حبيبى .. استنى يا عمى لما تاكل لقمه معانا انت من صباحيه ربنا مأكلتش ايتها حاجه وكده ما ينفعش علشان صحتك .
صلاح رد وقال .. ايوا يا ابوى اصبر لما تاكل وبعدين اطلع وريح جسمك شويه علشان تاخد علاجك .. انت بقالك فترة كبيرة مختوش وكده غلط عليك يا حاج .. والحاجه انعام لو عرفت انك اهملت علاجك بالمنظر ده هاتزعل منك اوى .. يرضيك لما ترجع لنا بالسلامه تعرف انك مكنتش بتاخد علاجك .

الحاج صفوان ابتسم نصف ابتسامه وقال .. ربنا يرجعها لينا بالسلامه .. السرايه بقالها كتيييير اوى مضلمه من غيرها ومن غير حسها فيها .. وكمان من غير الواد عدى وفهد .. اللى كانوا بيملوا علينا السرايه ضحك وهزار ومقالب .. والله ما عارف انا اللى وصلتهم فى اللى هما فيه دلوقتى ده .. وانا اللى خليتهم يسهروا فى المصنع لوقت متاخر زى اليوم المشؤوم ده .. انا يا دوبك كنت بعاقبهم وبقرص ودنهم مش اكتر على اللى هببوه ليله دخلتهم .. مكنتش اعرف انها هاتقلب عليهم بالمنظر ده . ياااااارب .

يارب افرجها من عندك يا رحيم .. ورجهم لينا كلهم على خير .. وترجع لمتنا الحلوة زى زمان .. وابعد عننا العيون الحاسده اللى حسدتنا .
وقام وقف وطلع على اوضته فى الدور اللى فوق .. وطلع معاه قصى وهو ساند ايده لانه فعلا مكنش قادر يمشى على رجله من البهدله اللى شافوها طول الايام الطويله دى كلها .

لحد ما قصى وصله لباب اوضته ودخله وقعده على السرير وقال .. تحب اساعدك يا جدى واغير معاك لبسك ؟
الحاج صفوان بتعب رد وقال .. لا يا ولدى كتر خيرك تعبتك معايا .. روح انت على اوضتك وريحلك شويه وسلملى على البت فرح ما شوفتهاش خالص النهارده ومجتش معانا حتى المستشفى الصبح واحنا رايحين لجدتك .

قصى .. معلش يا جدى .. هى من ساعه ما قامت الصبح وهى تعبانه وشكلها داخله على دور برد جامد .. لو لقيتها صاحيه هابعتهالك تشوفها وتقعد معاك شويه .
الحاج صفوان رد وقال .. الف سلامه عليها يا ولدى .. انا مش عارف ايه بس اللى بيحصل لنا اليومين دول كلنا ربنا يسترها .
قصى بكل حنيه طب طب على جده وباس راسه وقال .. عن اذنك يا جدى وخرج من الاوضه وراح على اوضته .. وهو رايح قابل سلمى اخته وسألها عن فرح .. فاسلمى قالته انها كانت معاهم فى الجنينه من شويه واستأذنت وطلعت على اوضتها علشان حست انها مصدعه جامد وهاتريح على السرير عقبال لما انتم تيجوا من بره .

قصى سابها وفتح باب الاوضه بتاعته وقفله وراه وشاف فرح فعلا نايمه على السرير ومتغطيه .
فقعد على حرف السرير جنبها وبدأ يلمس وشها بايده بكل حب وحنيه ووطى وباسها من خدها .
وده اللى خلاها تفتح عنيها وقالت .. قصى انتم رجعتم امتى يا حبيبى ؟
قصى عدل نفسه على السرير ونام جنبها وضمها لصدره وقال .. رجعنا من شويه يا قلبى .. المهم طمنينى عليكى .. انتى لسه تعبانه .. سلمى قالتلى انك كنتى تعبانه وطلعتى تنامى شويه .

فرح ردت وقالت .. لا يا حبيبى انا بقيت احسن متقلقش المهم طمنى على عدى وفهد اخبارهم ايه دلوقتى ؟
قصى بحب طمنها عليهم وحكالها كل اللى حصل معاهم فى مديريه الامن وكمان طلب منها انها تبقى تروح وتطمن على جدها لو قادرة علشان تعبان شويه وسال عليها .
فرح قامت وقعدت على السرير وزعلت لما عرفت ان جدها تعبان ولسه هاتنزل من السرير وتروحله الا و...